ភ្នំពេញ៖ តាមរយៈសារសំឡេងដែលផ្សាយក្នុងឆាណែលតេឡេក្រាមឯកសារមន្ត្រីសាធារណៈនាថ្ងៃទី១៩ ខែកក្កដា នេះ រដ្ឋមន្ត្រីក្រសួងប្រៃសណីយ៍ និងទូរគមនាគមន៍កម្ពុជា លោក ជា វ៉ាន់ដេត បានប្រាប់ពលរដ្ឋបើទៅកន្លែងណាក៏ដោយបើអត់មានសេវាទូរសព្ទទេ អាចមកប្តឹងក្រសួងប្រៃសណីយ៍បានដើម្បីចាត់វិធានការលើក្រុមហ៊ុនទូរសព្ទនោះ។

លោក ជា វ៉ាន់ដេត បានថ្លែងឱ្យដឹងដូច្នេះថា៖«នៅទីណាក៏ដោយ បើអត់មានសេវាទូរសព្ទ អាចប្តឹងមកក្រសួង ក្រសួងនឹងហៅក្រុមហ៊ុន(ទូរសព្ទ)មក ហើយពេលនោះនឹងមើលឃើញទាំងអស់គ្នា»។

រដ្ឋមន្ដ្រីក្រសួងប្រៃសណីយ៍ លោក ជា វ៉ាន់ដេត បានគូសបញ្ជាក់ថា ក្រសួងបានចេញសេចក្តីប្រកាសអំពីគុណភាពសេវាទូរសព្ទចល័ត និងសេវាអ៊ីនធឺណិត ដោយទុករយៈពេល៨ខែឱ្យក្រុមហ៊ុនធ្វើការកែលម្អ និងពង្រឹងគុណភាពសេវាទូរគមនាគមន៍របស់ខ្លួន។

លោក ជា វ៉ាន់ដេត អះអាងថា ចាប់ពីពេលនេះតទៅ ក្រសួងប្រៃសណីយ៍នឹងផាកវិន័យលើក្រុមហ៊ុនណាដែលមិនបានពង្រឹងគុណភាពសេវាទូរគមនាគមន៍របស់ខ្លួន៕